თაიგულის მიღება ყოველთვის სასიამოვნო ემოციაა, თუმცა ხშირად ჩნდება კითხვა: როგორ შევინარჩუნოთ ეს სილამაზე რაც შეიძლება დიდხანს?
ფლორისტიკა არ მთავრდება თაიგულის შეკვრით — ის გრძელდება თქვენს ლარნაკში.
დღეს გაგიზიარებთ იმ პროფესიულ საიდუმლოებებს, რომლებსაც ევროპელი ფლორისტები მცენარის სიცოცხლის გასახანგრძლივებლად იყენებენ.
წყალი - სიცოცხლის მთავარი წყარო
ბევრი ფიქრობს, რომ ნებისმიერი წყალი გამოდგება, თუმცა არსებობს რამდენიმე წესი:
ტემპერატურა - ყვავილების უმეტესობას გრილი წყალი უყვარს. თუმცა, თუ თაიგულში გაქვთ მერქნიანი ღეროები (მაგალითად, ჰორტენზია ან ვარდი), ოთახის ტემპერატურის წყალი საუკეთესო არჩევანია.
სისუფთავე - წყალი ლარნაკში ყოველდღე უნდა შეიცვალოს. ბაქტერიები ყვავილის ნაადრევი ჭკნობის მთავარი მიზეზია.
ღეროს სწორი დაჭრა -"ოქროს წესი"
ეს არის ის ნაბიჯი, რომელსაც ხშირად გამოტოვებენ. სანამ თაიგულს ლარნაკში მოათავსებთ:
გამოიყენეთ ძალიან ბასრი დანა ან სეკატორი. ბლაგვი მაკრატელი ღეროს ჭყლეტს და მცენარე წყალს ვეღარ იწოვს.
გაჭერით ღერო 45-გრადუსიანი კუთხით. ეს ზრდის ფართობს, საიდანაც ყვავილი წყალს სვამს.
მნიშვნელოვანია: ღეროს დაჭრისთანავე მოათავსეთ ყვავილი წყალში, რათა ჰაერმა არ მოასწროს მილაკების დახშობა.
ფოთლების კონტროლი - არასოდეს დატოვოთ ფოთლები წყლის დონის ქვემოთ. წყალში მოხვედრილი ფოთოლი ლპობას იწყებს, რაც აფუჭებს წყლის ხარისხს და კლავს ყვავილს. ევროპული ფლორისტიკის ერთ-ერთი მთავარი პრინციპი სწორედ "სუფთა ღეროა".
ლოკაცია - სად დავდგათ თაიგული?
თქვენი კომპოზიციის მტერი სამი რამ არის: მზის პირდაპირი სხივები, ორპირი ქარი და ხილი.
დიახ, ხილი! მწიფე ხილი (განსაკუთრებით ვაშლი და ბანანი) გამოყოფს ეთილენის გაზს, რომელიც ყვავილების ჭკნობის პროცესს აჩქარებს. ამიტომ, ნუ დადგამთ თაიგულს ხილის ლანგართან ახლოს.
რატომ არის Fleur de Tbilisi-ს ყვავილები გამძლე?
ჩვენს სახელოსნოში თითოეული მცენარე გადის "ჰიდრატაციის" სპეციალურ ეტაპს. გარდა იმისა რომ ჩვენ ყვავილს ვუვლით პროფესიონალურად, ამასთან ვიყენებთ სპეციალურ ტემპერატურულ რეჟიმს, რაც უზრუნველყოფს, რომ თაიგული თქვენამდე მაქსიმალურად ჯანსაღ მდგომარეობაში მოვიდეს.